د کندهار ولایت ځایی چارواکو خبر ورکړی، چې په دغه ولایت کې له بې‌وزلو او غریبانو سره د مرستی کولو ادارې له ۲۵۰ کورنیو سره د خوراکی توکو مرسته وکړه. دغه اداره چې د سرپرست حکومت واک ته له رسېدو سره سمه جوړه شوې، ګڼ شمېر کونډې، یتیمان، اړمنې او سوال کوونکی کورنۍ یې ثبت کړې، چې د یوې ځانګړی پروسې له لاری ورسره هره میاشت د خوراکی توکو او نغدی پیسو مرسته کوی. د یادی مرستی په لړ کې پرون له ۲۵۰ اړمنو کورنیو سره د نغدی پیسو، اوړو، غوړیو او وریجو مرسته وشوه. ددې ادارې مسوولین وایی، چې له یادو کورنیو سره به په راتلونکې کې هم مرستی دوام ولری.